Президент

24 апрел зимни  сафари корӣ ба шаҳри Норак  Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон пас аз ифтитоҳи агрегати рақами №7 Неругоҳи барқии обии Норак, 8 иншоти таъйиноти иҷтимоӣ, иқтисодӣ  ва саноатиро ба таври  фосилавӣ мавриди истифода қарор доданд. Нахуст Роҳбари давлат муҳтарам Эмомалӣ Раҳмон бинои Шуъбаи равонӣ ва наркологӣ дар назди Беморхонаи марказии шаҳри Норакро, ки  аз ҷониби соҳибкори ватандӯст Абдурасул Муҳидзода бунёд гардидааст, ифтитоҳ намуданд. Иншооти мазкур дорои шароити муосири хизматрасонии тиббӣ буда, дар он 35 кас бо кор таъмин гардидаанд. Иншооти дигаре, ки ба таври фосилавӣ мавриди баҳрабардорӣ қарор дода шуд, бинои нави танзимгарон, ташхисгоҳ ва мошинсарой барои мутахассисоне буд, ки дар самти таъмини аҳолии шаҳр бо оби тозаи нӯшокӣ ва полезӣ масъуланд. Дар бинои мазкур барои 40 мутахассис шароити мусоиди корӣ фароҳам гардидааст. Мақсад аз бунёди иншоот  барқарорсозиии шабакаҳои обтаъминкунӣ ва обҳои корезӣ, баланд бардоштани сифати хизматрасонӣ ва беҳтар гардидани вазъи санитарию экологии ҳудуди шаҳри Норак арзёбӣ гардид. Инчунин дар доираи татбиқи ҳадафи чоруми миллӣ- Саноатикунонии босуръати кишвар дар деҳоти Лангар, корхонаи парандапарварии Мурғи гӯштӣ  ба истифода дода шуд. Дар корхонаи мазкур  6 ҳазор сар  паранда парвариш меёбад. Масъулин нақша доранд, ки то  ҷашни 35 солагии Истиқлоли давлатии Ҷумҳурии Тоҷикистон саршумори мурғро ба зиёда аз 15 ҳазор расонанд. Ҳамчунин 2 муассисаи томактабӣ барои 120 кӯдак дар деҳаи  Чал-Чал ва Чашма ба фаъолият оғоз намуданд, ки ин иқдоми созанда дар самти фарогирии бештари кӯдакон ба таҳсилоти томактабӣ ва тарбияи насли наврас аҳамияти баланд дорад. Бинои муассисаи таҳсилоти томактабӣ барои 60 кӯдак дар деҳаи Чашмаи 1, бо 12 ҷойи корӣ дар хизмати сокинон қарор дода шуд. Дар доираи тадбирҳои ободонӣ бинои маъмурии шуъбаи Агентии суғуртаи иҷтимоӣ ва нафақа дар шаҳри Норак  бо 11 ҷойи корӣ ба фаъолият оғоз намуд. Ҳамчунин бинои нави фуруши молҳои ниёзи мардум ва фурӯши сабзавоти тару тоза дар бозори Рамзи Норак аз ҷониби соҳибкори ҷавон Аминҷон Асадуллозода ифтитоҳ ёфт, ки дар он 80 сокини маҳаллӣ бо ҷойи кор таъмин гардиданд. Инчунин майдончаи варзишӣ аз ҷониби Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон бунёд гардидааст, ки рушди футболи кишвар ва омавигардонии варзиш мусоидати фаъол хоҳад кард. Коргоҳи хурди истеҳсоли бетон дар назди корхонаи Дӯкон дар ҷамоати деҳоти Дӯконӣ аз ҷониби соҳибкори маҳаллӣ Абдукарими  Назар бунёд гардидааст. Иқтидори истеҳсолии коргоҳ 40 метри мукааб дар як рӯз буда, дар он 15 сокини маҳаллӣ бо кори доимӣ таъмин мегардад. Дар ҳамин ҷо лоиҳаи осоишгоҳи муосири табобатӣ, истироҳатӣ ва сайёҳӣ, ки дар соҳили зебоманзари дарёи Вахш ҷойгир хоҳад шуд, муаррифӣ гардид. Осоишгоҳ барои қабули зиёда аз сад кас дар як вақт пешбинӣ шуда, дар он даҳҳо сокини маҳалӣ соҳиб кор ва маоши хуб хоҳанд шуд. Ҳоло сохтмони 3 муассисаи таълимии томактабӣ бо фарогирии 900 кӯдак дар шаҳри Норак идома дорад, ки то ҷашни 35-солагии Истиқлоли давлатии Тоҷикистон мавриди истифода қарор хоҳанд гирифт. Зимни муаррифии иншооти мазкур Сарвари давлат муҳтарам Эмомалӣ Раҳмон ба масъулин ҷиҳати густариши корҳои ободониву созандагӣ бахшида ба ҷашни бузурги миллӣ 35-солагии Истиқлоли давлатӣ дастуру тавсияҳо доданд.

24 апрел Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо мақсади шиносоӣ бо вазъи зиндагии мардум ва ифтитоҳи иншооти таъиноти гуногун ба шаҳру ноҳияҳои вилояти Хатлон сафар намуданд. Сафари кории Роҳбари давлат муҳтарам Эмомалӣ Раҳмон  аз шаҳри Норак оғоз ёфт. Зимни сафари корӣ Пешвои миллат муҳтарам Эмомалӣ Раҳмон нахуст агрегати №7 Неругоҳи барқии обии Норакро ба истифода доданд. Тавре зикр гардид, корҳои сохтмонӣ ва таҷдид моҳи октябри соли 2024 оғоз ёфта, дар муҳлати пешбинишуда бо сифати баланд анҷом дода шудааст. Паймонкори асосии лоиҳа ширкати Андритз гидро буда, иҷрои корҳои зерпаймониро Ҷамъияти саҳомии кушодаи “Тоҷик СГЕМ” ба уҳда дошт. Дар доираи ин лоиҳа таҷҳизоти асосии гидроагрегат пурра нав карда шуда, технологияҳои муосири ҷавобгӯ ба талаботи байналмилалӣ ҷорӣ гардиданд. Ин тадбирҳо имкон медиҳанд, ки кори агрегат боэътимод ва самаранок ба роҳ монда шуда, муҳлати истифодаи он барои солҳои зиёд таъмин гардад. Маблағгузории навсозии гидроагрегати рақами ҳафт дар доираи ҳамкории судманд бо шарикони байналмилалӣ амалӣ гардид. Аз ҷумла, барои татбиқи ин лоиҳаи муҳим 34 миллион евро дар шакли қарз ҷалб карда шуда, ҳамзамон 9,5 миллион сомонӣ аз ҳисоби буҷаи давлатӣ равона гардид. Ин тарзи маблағгузорӣ имконият фароҳам овард, ки корҳои навсозӣ бо истифода аз технологияҳои муосир ва мутобиқ ба меъёрҳои байналмилалӣ анҷом ёфта, самаранокии фаъолияти неругоҳ ба таври назаррас баланд бардошта шавад. Пас аз анҷоми навсозӣ иқтидори истеҳсолии гидроагрегат афзоиш ёфт. Он метавонад дар як шабонарӯз то 8 миллион киловатт-соат неруи барқ истеҳсол намояд. Хотиррасон гардид, ки корҳои навсозии таҷҳизоти неругоҳи Норак соли 2019 оғоз ёфта, то ин вақт 3 агрегати он пурра иваз шудааст. Ҳамчунин, таҷҳизоти зиёди ёрирасон мавриди навсозӣ қарор гирифтааст. Дар натиҷаи навсозии 3 агрегат тавоноии неругоҳ 260 МВт зиёд шуд, ки ин аз иқтидори пурраи неругоҳи Сангтуда-2 бештар мебошад. Ҳоло навсозии агрегати чоруми неругоҳ бо маҷмуи таҷҳизоти ёрирасони он идома дорад. Дар маҷмуъ тибқи лоиҳаи навсозии неругоҳ ҳамаи агрегатҳои он бо харҷи 750 миллион доллари амрикоӣ то соли 2032 нав карда мешаванд. Ҳамчунин, бо харҷи зиёда аз 1 миллиард доллари амрикоӣ навсозии ҳамаи неругоҳҳои барқии мавҷудаи Тоҷикистон навсозӣ шуда истодаанд, ки ба ин восита муҳлати хизмати онҳо 70-80 соли дигар тамдид меёбад. Зимни шиносоӣ Пешвои миллат муҳтарам Эмомалӣ Раҳмон ба фаъолияти кормандон ва мутахассисони соҳа баҳои баланд дода, саҳми онҳоро дар пешрафти энергетикаи кишвар муҳим арзёбӣ намуданд. Таъкид гардид, ки рушди ин соҳа яке аз самтҳои афзалиятноки сиёсати давлатӣ мебошад. Ҳамчунин ба масъулин супориш дода шуд, ки ба истифодаи самараноки таҷҳизоти нав, нигоҳдории босифати онҳо ва омодасозии кадрҳои баландихтисос таваҷҷуҳи ҷиддӣ зоҳир намоянд. Бо татбиқи чунин лоиҳаҳои бузург, Тоҷикистон тадриҷан мавқеи худро ҳамчун кишвари дорои имкониятҳои васеи истеҳсоли неруи “сабз” тақвият бахшида, ба таҳкими пояҳои истиқлолияти энергетикии кишвар мусоидат мекунад.

Имрӯз дар Қасри миллат Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон кадрҳоеро, ки дар вазоратҳои мудофиа, корҳои хориҷӣ, Қӯшунҳои сарҳадии Кумитаи давлатии амнияти миллӣ, Кумитаи давлатии идораи замин ва геодезӣ, Кумитаи телевизион ва радиои назди Ҳукумати Ҷумҳурии Тоҷикистон ба вазифаҳои масъулу роҳбарикунанда таъин гардиданд, барои суҳбат ба ҳузур пазируфтанд. Нахуст Пешвои миллат фаъолияти сохторҳои низомӣ ва ҷузъу томҳои Вазорати мудофиа ва Қӯшунҳои сарҳадии Кумитаи давлатии амнияти миллиро ҳамаҷониба таҳлил намуда, таъкид намуданд, ки дар шароити ҳассосу мураккаби ҷаҳони имрӯза ҳушёриву зиракии беш аз ҳарвақта дар ҳимояи марзу буми Ватан, такмили омодагии ҷангӣ, таъмини пайвастаи техникаву лавозимоти муосир, табодули иттилоот, ҳамоҳансозии фаъолияти ҷузъу томҳо ва умуман таъмини амну суботи кишвар аз вазифаҳои аввалиндарҷаи ҳар як роҳбар бояд бошад. Бартараф намудани сабабу омилҳои халалдоркунандаи фаъолияти муназзами хизматӣ дар воҳидҳои низомӣ, пешгирии қонунвайронкунӣ миёни хизматчиёни ҳарбӣ, тарбияи наваскарон дар рӯҳияи ватандӯстӣ, омӯзиши техникаи муосири ҷангӣ ва забонҳои хориҷӣ, таъмини ҳамаҷонибаи ҷузъу томҳо бо ашёи зарурӣ аз мавзӯъҳои асосии суҳбат буд. Мутобиқи банди 8 моддаи 69 Конститутсияи Ҷумҳурии Тоҷикистон пешниҳодҳои Президенти Ҷумҳурии Тоҷикистон муҳтарам Эмомалӣ Раҳмон “дар бораи қатъ намудани ваколати судяи Суди конститутсионии Ҷумҳурии Тоҷикистон Ҷамшедзода Ҷамшед Назаршо бинобар вафоташ”,  “дар бораи интихоб намудани судяи Суди конститутсионии Ҷумҳурии Тоҷикистон Қодирзода Ҷурабек Шариф” ва “дар бораи бозхонд намудани Аминзода Сайдабону Рустам бо сабаби расидан ба синни ниҳоии дар вазифаи судя будан” ба Маҷлиси миллии Маҷлиси Олии Ҷумҳурии Тоҷикистон манзур карда шуданд. Дар якчанд сохторҳои Вазорати мудофиа ва Қӯшунҳои сарҳадии Кумитаи давлатии амнияти миллӣ низ тағироти кадрӣ сурат гирифта, комиссарони ҳарбии як қатор шаҳру ноҳияҳои мамлакат ва сардорони баъзе отряду дигар воҳидҳои низомии Қӯшунҳои сарҳадии Кумитаи давлатии амнияти миллӣ аз ҳисоби афсарони соҳибтаҷриба таъин гардиданд. “Фаъолияти мақомоти марбута дар самти пешгирии убури ғайриқонунии сарҳади давлатӣ, қочоқи маводи мухаддир ва дигар молу маҳсулот аз ҳар як марзбон ҳушёриву зиракӣ ва далериву шуҷоатро талаб менамояд, – таъкид намуданд Президенти кишвар муҳтарам Эмомалӣ Раҳмон. Таъкид гардид, ки кашфи фаъолияти гурӯҳҳои муташаккили ҷинояткорӣ бояд ҳаматарфа мавриди таҳлилу омӯзиш қарор гирифта,  роҳу усулҳои мураккабу пешгӯинашавандаи қочоқчиён ошкор, пешгирӣ ва бартараф карда шаванд. Зимни суҳбат ба кадрҳо доир ба софдилонаю содиқона ва бо виҷдони пок иҷро намудани вазифаҳои хизматӣ ба нафъи давлат ва мардуми Тоҷикистон дастуру тавсияҳо дода шуд. Таъкид гардид, ки ҳангоми иҷрои вазифа манфиатҳои давлат бояд дар мадди аввал қарор дошта бошанд.

22 апрел Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Остона дар ҷаласаи Шурои сарони давлатҳои муассиси Фонди байналмилалии наҷоти Арал иштирок ва суханронӣ намуданд. Таъкид гардид, ки аз замони таъсиси Фонд, Тоҷикистон онро ҳамчун механизми муҳими ҳамкории бисёрҷониба байни кишварҳои минтақа дар масъалаҳои идораи захираҳои об ва экология эътироф намудааст. Роҳбари давлати мо муҳтарам Эмомалӣ Раҳмон иброз доштанд, ки буҳронҳои бузурги экологӣ дар минтақа, аз ҷумла фоҷиаи баҳри Арал, аз мо тадбирҳои минбаъдаи муштаракро талаб менамояд. Гуфта шуд, ки дар давоми давраи гузашта, мо дар доираи Фонди байналмилалии наҷоти Арал ба ташаккули майдони фарох барои муҳокимаи озоди масъалаҳои марбут ба ин буҳрон ва ҷалби таваҷҷуҳи ҷомеаи ҷаҳонӣ ба ин мушкилот муваффақ шудем. Ҳамчунин, зикр гардид, ки бо талошҳои муштарак ва бо дастгирии шарикони байналмилалӣ, дар кишварҳои мо лоиҳаҳо ва барномаҳои зиёди минтақавӣ дар идоракунии захираҳои об ва ҳифзи муҳити зист татбиқ гардиданд. Муҳтарам Эмомалӣ Раҳмон аз рӯ ба рӯ шудан бо хатарҳо ва мушкилоти ҷиддии дорои хусусияти экологӣ дар минтақа ёдовар шуда, обшавии босуръати пиряхҳо, таназзули низомҳои экологӣ ва офатҳои табиии гуногуни вобаста ба обро аз ҷумлаи онҳо номиданд. Хокборишҳо, ки дар солҳои охир ба зуҳуроти бисёр маъмул табдил ёфтаанд, махсус таъкид карда шуд. Зикр гардид, ки хокборишҳо ҳам ба саломатии аҳолӣ ва ҳам ба пиряхҳо – манбаи асосии оби нӯшокӣ ва заминҳои кишоварзӣ – манбаи асосии даромади аксари аҳолии кишварҳои минтақа, таъсири манфӣ мерасонанд. Дар робита ба ин даъват карда шуд, ки барои бартараф намудани оқибатҳои манфии ин зуҳурот чораҳои муштараки қатъӣ андешида шавад. “Тоҷикистон, ки дар ҳудуди он то 60 фоизи ҷараёни дарёҳои минтақа, манбаи асосии оби тоза, ташаккул меёбад, оқибатҳои ин офатҳоро башиддат эҳсос менамояд”, – изҳор доштанд Президенти кишвари мо муҳтарам Эмомалӣ Раҳмон. Таъкид шуд, ки афзоиши босуръати аҳолӣ ва зиёдшавии истеъмоли об дар ҳама бахшҳои иқтисодиёт дар якҷоягӣ бо тағирёбии иқлим ба захираҳои об фишори назаррас меорад. Ин омилҳо мустақиман ба суботи энергетикӣ, озуқаворӣ ва экологӣ дар минтақа таъсир мерасонад. Муҳтарам Эмомалӣ Раҳмон таъкид намуданд, ки дар чунин шароит, бояд ба истифодаи самараноки механизмҳои мавҷудаи ҳамкорӣ дар масъалаҳои захираҳои об дар Осиёи Марказӣ афзалияти хосса дода шавад. Сарвари давлати мо мутобиқсозии Фондро ба воқеияти замон барои таҳким ва рушди ҳамкории минтақавӣ дар ҳавзаи баҳри Арал муҳим шумурданд. Гуфта шуд, ки Тоҷикистон пайваста ҷонибдори такмили сохтории ташкилӣ ва заминаи шартномавӣ – ҳуқуқии Фонд бо мақсади бахшидани самаранокии бештар ба фаъолияти он мебошад. Президенти кишвари мо муҳтарам Эмомалӣ Раҳмон пешниҳод намуданд, ки дар чаҳорчӯби Фонди байналмилалии наҷоти Арал Комиссияи байнидавлатии энергетикии Осиёи Марказӣ таъсис дода шавад. Тавре зикр гардид, масъалаҳои вобаста ба об дар саросари ҷаҳон афзалиятнок ва хеле ҳассос боқӣ мемонанд. Муҳтарам Эмомалӣ Раҳмон изҳор доштанд, ки минтақаи Осиёи Марказӣ ва механизмҳои ҳамкорие, ки мо таъсис додаем, намунаи мусбати истифодаи муштараки захираҳои обиро нишон медиҳанд. “Бо назардошти мушкилоти дар боло гуфташуда ва рушди технологияи нав, мо бояд тадбирҳои истифодаи маҷмӯӣ ва оқилонаи захираҳои обӣ ва ҳифзи онро пурзӯр намоем”, – таъкид карданд Президенти кишвари мо муҳтарам Эмомалӣ Раҳмон. Дар робита ба ин, тезонидани татбиқи технологияҳои нави сарфакунандаи об ва энергия дар соҳаи кишоварзӣ, бахши коммуналӣ ва саноат, тайёр кардани насли нави мутахассисон, тавсеаи мубодилаи академикӣ ва таҳқиқоти муштараки илмию амалӣ оид ба масъалаҳои тағйирёбии иқлим ва истифодаи оқилонаи об аз вазифаҳои аввалиндараҷа номида шуд. Муҳтарам Эмомалӣ Раҳмон зимни суханронӣ аз пешбурди масъалаҳои рӯзномаи ҷаҳонии об ёдовар шуда, таъкид намуданд, ки имсол, ҷиҳати татбиқи ташаббусҳои Тоҷикистон дар соҳаи об дар охири моҳи май дар шаҳри Душанбе Конфронси чоруми байналмилалии сатҳи баланд оид ба Даҳсолаи байналмилалии амал “Об барои рушди устувор, солҳои 2018-2028” баргузор мегардад. Дар фароварди сухан Роҳбари давлати мо муҳтарам Эмомалӣ Раҳмон аз роҳбарони ҳайатҳои иштирокдори ҷаласа даъват намуданд, ки ба Тоҷикистон ташриф оварда, дар ин конфронси сатҳи баланд ширкат варзанд. 22.04.2026 Қазоқистон

22 апрел Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Остонаи Ҷумҳурии Қазоқистон дар Ҳамоиши минтақавии экологӣ дар мавзуи “Диди муштарак барои ояндаи устувор” иштирок ва суханронӣ намуданд. Таъкид гардид, ки тағйирёбии иқлим, таназзули низомҳои экологӣ, норасоии захираҳои об ва офатҳои табиӣ ҳам барои минтақа ва ҳам барои тамоми ҷаҳон ба мушкилоти ҷиддӣ табдил меёбанд ва ин вазъият аз мо тадбирҳои муштараку ҳамоҳангро тақозо менамояд. Роҳбари давлати мо муҳтарам Эмомалӣ Раҳмон таъкид намуданд, ки дар ҳудуди Тоҷикистон то 60 фоизи захираҳои обии Осиёи Марказӣ ташаккул меёбанд ва ин нақши муҳими низоми экологии кӯҳии кишвари моро дар таъмини обрасонӣ ва рушди устувор дар минтақа собит менамояд. Муҳтарам Эмомалӣ Раҳмон изҳор доштанд, ки раванди босуръати обшавии пиряхҳо дар саросари ҷаҳон тамоюли афзоиш дошта, ба вайроншавии тавозуни об, ба вуҷуд омадани таҳдидҳо ба муҳити зист ва зиёд гардидани хавфи офатҳои табиии вобаста ба об оварда мерасонад. Президенти кишвари мо муҳтарам Эмомалӣ Раҳмон ҳамзамон тамоюли нигаронкунандаи афзоиши басомад ва давомнокии зуҳуроти тӯфонҳои чанголудро дар кишварҳои минтақа, ки ба саломатии аҳолӣ ва муҳити зист таъсири манфӣ мерасонанд, таъкид намуданд. Роҳбари давлат муҳтарам Эмомалӣ Раҳмон аз талошҳои пайвастаи Тоҷикистон дар доираи Раванди оби Душанбе барои пешбурди рӯзномаи ҷаҳонии обу иқлим ёдрас шуданд. Гуфта шуд, ки имрӯз қатъномаи Созмони Милали Муттаҳид оид ба Даҳсолаи байналмилалии амал “Об барои рушди устувор” дар марҳилаи татбиқи фаъол қарор дорад. Муҳтарам Эмомалӣ Раҳмон Конфронси якуми байналмилалии сатҳи баланд оид ба ҳифзи пиряхҳоро, ки соли гузашта дар шаҳри Душанбе баргузор шуда буд, минбари муассири ҳамоҳангсозии талошҳои ҷонибҳои манфиатдор ва андешидани тадбирҳои минбаъда дар ин самт маънидод намуданд. Ҳамзамон, аҳамияти қабули Қатъномаи Созмони Милали Муттаҳид дар бораи эълон кардани Даҳсолаи амал оид ба дастгирии илмҳои криосферӣ (2025-2034) ва таъсиси Маркази минтақавии омӯзиш ва мониторинги пиряхҳо ва криосфераи Осиёи Марказӣ таҳти сарпарастии Созмони ҷаҳонии метеорологӣ дар шаҳри Душанбе таъкид гардид. Президенти Ҷумҳурии Тоҷикистон муҳтарам Эмомалӣ Раҳмон таваҷҷуҳи иштирокдорони Саммитро ба масъалаҳои мусоидат ба гузариши иқлимӣ ҳамчун  яке аз самтҳои афзалиятноки рушд, густариши манбаъҳои барқароршавандаи энергия ва мавзӯи баланд бардоштани самаранокии энергетикӣ ва ташаккули иқтисодиёти камкарбон ҷалб намуданд. Зикр гардид, ки барои Тоҷикистон рушди гидроэнергетика ва дигар манбаъҳои тозаи энергия афзалияти стратегӣ дорад. Ба андешаи муҳтарам Эмомалӣ Раҳмон дар шароити кунунӣ, сафарбарсозии сармоягузориҳои экологӣ ва ҷорӣ намудани механизмҳои бозории дастгирии рушди “сабз” аҳамияти хоса касб менамояд. Таъкид гардид, ки дар ин замина, Ҳукумати Ҷумҳурии Тоҷикистон барориши вомбаргҳои “сабз”-ро амалӣ менамояд. Ин қадами муҳим дар роҳи ҳамгироии кишвар ба низоми ҷаҳонии маблағгузории устувори иқлимӣ мебошад. Муҳтарам Эмомалӣ Раҳмон баррасии имконияти ташаккули марҳилавии бозори минтақавии карбонро барои дастгирии талошҳо дар самти коҳиши партовҳо ва ҷалби сармоягузориҳои нав ба мақсад мувофиқ шумориданд. Иброз гардид, ки ҳифз ва истифодаи оқилонаи захираҳои биологӣ қадами муҳим дар ҳалли масъалаҳои муҳити зист мебошад ва бо назардошти ин, дар Тоҷикистон Барномаи давлатии сабзкорӣ барои давраи то соли 2040 қабул гардидааст. Президенти кишвари мо муҳтарам Эмомалӣ Раҳмон изҳор доштанд, ки Тоҷикистон барномаҳо ва лоиҳаҳои гуногуни давлатиро оид ба ҳифзи намудҳои беназир ва нодири ҳайвоноти кӯҳӣ фаъолона амалӣ мекунад. “Ин ва дигар талошҳои мо барои ҳифзи муҳити зисти табиӣ ва таъмини муносибати эҳтиёткорона ба табиат нигаронида шудаанд”, – иброз доштанд муҳтарам Эмомалӣ Раҳмон. Бо мақсади баланд бардоштани самаранокии ҳамкории минтақавии экологӣ рушди василаҳои сохтории он ва таҳияи мавқеъҳои ҳамоҳангшудаи минтақавӣ дар арсаи байналмилалӣ зарур шумурда шуд. Дар ин замина, муҳтарам Эмомалӣ Раҳмон, инчунин аҳамияти Маркази минтақавӣ оид ба идоракунии партовҳоро, ки дар шаҳри Душанбе таъсис ёфтааст, таъкид намуданд. Роҳбари давлати мо муҳтарам Эмомалӣ Раҳмон аз дастгирии ташаббусҳои ҷаҳонии Тоҷикистон ҷиҳати пешбурди манфиатҳои муштараки кишварҳои Осиёи Марказӣ дар сатҳи байналмилалӣ ёдовар шуданд. Аз иштирокдорон даъват ба амал оварда шуд, ки дар Конфронси чоруми байналмилалии сатҳи баланд оид ба татбиқи ҳадафҳои Даҳсолаи байналмилалии амал “Об барои рушди устувор”, ки даҳаи сеюми моҳи майи соли равон дар шаҳри Душанбе баргузор мегардад, ширкат варзанд. Дар интиҳои кори Ҳамоиши минтақавии экологӣ дар мавзуи “Диди муштарак барои ояндаи устувор” Эъломияи муштараки сарони давлатҳо қабул гардида, Барномаи минтақавии амал барои солҳои 2026-2030 тасдиқ карда шуд. 22.04.2026 Қазоқистон

22 апрел Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Остона дар ҳошияи Саммити минтақавии экологӣ дар мавзуи “Диди муштарак барои ояндаи устувор” якҷо бо дигар сарони давлатҳо ва ҳайатҳои иштирокдор аз намоишгоҳи Саммит боздид намуданд. Дар намоишгоҳ павилиони Тоҷикистон ҳам мавҷуд аст, ки саҳми кишвари моро дар пешбурди рӯзномаи иқлим нишон медиҳад. Ба сарони давлатҳо дар павилиони Тоҷикистон оид ба мушкилоти ҷаҳонии обшавии пиряхҳо, ҳифзи гуногунии биологӣ, беҳдошти муҳити зист, аҳамияту авлавияти гузариш ба “иқтисодиёти сабз” ва рушди экотуризм маълумот пешкаш гардид. Дар гӯшаи Тоҷикистон гуногунии табиат ва мероси фарҳангии Тоҷикистон, анъанаҳо, ҳунарҳо ва санъат, ки робитаи амиқи мардумро бо муҳити зист инъикос мекунанд, мақоми хоса дорад. Иттилоъ дода шуд, ки дар Тоҷикистон ба ҳифзи гуногунии биологӣ ва робитаи инсону табиат диққати махсус медиҳанд. Татбиқи босамари барномаҳои ҳифзи бабри барфӣ ва барқарорсозии саршумори бузи пармашох ва гӯсфанди кӯҳии архар (Марко Поло) аз ҷумлаи тадбирҳои назарраси Ҳукумати Ҷумҳурии Тоҷикистон ба шумор меравад. 22.04.2026 Қазоқистон

21 апрел Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ҳошияи Ҳамоиши экологӣ дар Остона бо Президенти Ҷумҳурии Арманистон муҳтарам Ваагн Хачатурян мулоқот намуданд. Зимни суҳбат атрофи доираи васеи масъалаҳои мавриди таваҷҷуҳи муштарак дар муносибатҳои ду кишвар ва ҳам вобаста ба рӯзномаи бисёрҷониба мубодилаи афкор сурат гирифт. Президенти кишвари мо, аз ҷумла, изҳор доштанд, ки “муносибатҳои миёни Тоҷикистон ва Арманистон ба анъанаҳои деринаи дӯстию  ҳамкорӣ, эҳтиром ва эътимод ба якдигар асос ёфтаанд”. Дар идома ҳамкории сиёсӣ, тиҷоратию иқтисодӣ, сармоягузорӣ ва фарҳангию башарии миёни ду кишвар баррасӣ гардид. Таваҷҷуҳи хос ба масъалаҳои амнияти минтақавӣ ва байналмилалӣ, бахусус, ба вазъият дар Ховари Миёна зоҳир карда шуд. Вобаста ба ин мавзуъ, муҳтарам Эмомалӣ Раҳмон бори дигар мавқеи устувори давлати моро дар ин масъала таъкид карда, изҳор доштанд: “Мо қотеъона ҷонибдори ҳалли осоиштаи ҳама гуна низоъҳо ва баҳсҳо бо истифода аз воситаҳои сиёсӣ ва дипломатӣ ҳастем.” 21.04.2026 Қазоқистон

21 апрел дар шаҳри Остона мулоқоти Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Президенти Ҷумҳурии Қазоқистон муҳтарам Қосим-Жомарт Токаев баргузор гардид. Дар ҷараёни суҳбат сарварони ду давлат ҳолати кунунӣ ва дурнамои муносибатҳои дуҷонибаи дӯстӣ ва ҳамкории Тоҷикистону Қазоқистонро дар заминаи шарикии стратегӣ ва ҳампаймонӣ мавриди муҳокима қарор доданд. Ҷонибҳо аз  ҷараёни баланди густариши шарикии ду кишвар дар ҳамаи самтҳо изҳори қаноатмандӣ намуданд. Аҳаммияти таҳкими минбаъдаи муколамаи сиёсии байнидавлатӣ, тавсеаи робитаҳои тиҷоративу иқтисодӣ ва сармоягузорӣ дар соҳаҳои мавриди манфиатҳои тарафайн, бахусус дар бахшҳои саноат, нақлиёт, логистика ва аграрӣ таъкид гардид. Ба сатҳи хуби афзоиши ҳаҷми тиҷорати дуҷониба,  ки аз рӯйи натиҷаҳои соли 2025 1,2 миллиард долларро ташкил дод, ишора карда шуд. Соҳаҳои рақамикунонӣ, инноватсия, технологияҳои муосир ва зеҳни сунъӣ ба сифати самтҳои ояндадори ҳамкорӣ муайян карда шуданд. Дар арсаи фарҳангиву башарӣ суҳбат атрофи тавсеаи таҷрибаи мубодилаҳои эҷодӣ, ҳамчунин, робитаҳо дар соҳаҳои илму маориф сурат гирифт. Дар самти амният сарони давлатҳо ба маъалаҳои таҳкими ҳамкориҳо  дар соҳаҳои низомӣ, низомиву техникӣ, инчунин, муқовимат ба хатару таҳдидҳои ҷаҳониву минтақавӣ диққати махсус доданд. Дар баробари ин, суҳбат фарогири масъалаҳои ҳамкории бисёрҷониба дар чорчӯби сохторҳои байналмилалӣ ва минтақавӣ буд. Дар ин замина мубодилаи афкор оид ба рӯзномаи Ҳамоиши экологии минтақавӣ ва ҷаласаи навбатии Шӯрои сарони давлатҳои муассиси Фонди байналмилалии наҷоти Арал, ки пагоҳ дар пойтахти Қазоқистон баргузор мешаванд, сурат гирифт. 21.04.2026 Қазоқистон

21 апрел Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон барои иштирок дар Ҳамоиши минтақавии экологӣ ва ҷаласаи Шурои сарони давлатҳои муассиси Фонди байналмилалии наҷоти Арал вориди шаҳри Остонаи Ҷумҳурии Қазоқистон шуданд. Дар фурудгоҳи байналмилалии ба номи Нурсултон Назарбоев Президенти Ҷумҳурии Тоҷикистон муҳтарам Эмомалӣ Раҳмонро Сарвазири Ҷумҳурии Қазоқистон Олжас Бектенов ва дигар намояндагони воломақом гарму самимӣ истиқбол гирифтанд. Ба ифтихори меҳмони олиқадр майдони фурудгоҳ бо парчамҳои давлатӣ оро ёфта, қаровули фахрӣ саф ороста буд. 21.04.2026 Қазоқистон

15 апрел дар Қасри миллат Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон аз як гуруҳ сафирони навтаини давлатҳои хориҷӣ эътимоднома қабул намуданд. Зимни маросим ба Президенти кишвар муҳтарам Эмомалӣ Раҳмон сафирони фавқулода ва мухтори Ҷумҳурии Исломии Покистон   Ирфон Аҳмед, Подшоҳии Арабистони Саудӣ Холид ибни Абдулло Аш-Шамронӣ, Ҷумҳурии Арабии Миср Тамер Фатхӣ Абдуссалом Ҳаммад, Ҷумҳурии Италия Гвидо Де Санктис, Шоҳигарии Белгия Эрик Де Майер, Ҷумҳурии Демократии Сотсиалистии Шри Ланка Фред Сеневиратне, Ҷумҳурии Зимбабве Грей Маронгве, Ҷумҳурии Малӣ Сейду Камиссоко ва Гвинеяи Экваторӣ Ндонг Айекаба Лусиано Нкого эътимодномаҳои худро бо паёму дуруд аз роҳбарияти кишварҳояшон тақдим карданд. Президенти кишвар муҳтарам Эмомалӣ Раҳмон зимни суханронӣ сафирони навро ба муносибати оғози фаъолияти дипломатиашон дар Ҷумҳурии Тоҷикистон табрику таҳният гуфтанд. Муҳтарам Эмомалӣ Раҳмон таъкид доштанд, ки имсол 9 сентябр мо 35-умин солгарди бузургтарин дастоварди таърихи навини худ – истиқлоли давлатиамонро ҷашн мегирем ва афзуданд, ки тайи ин давра Тоҷикистон сиёсати хориҷии мутавозину мусолиматомез ва созандаро роҳандозӣ намуда, дар асоси усули «дарҳои кушода» тавонист дар арсаи байналмилалӣ ҷойгоҳи шоиста касб намояд. Сарвари давлат аз робитаҳои фаъоли дипломатӣ бо 186 кишвари ҷаҳон дар соҳаҳои гуногун ёдовар шуда, изҳор доштанд, ки сафирон бо иқдомот ва тадбирҳои амалии худ метавонанд ба таҳкиму тавсеаи минбаъдаи ҳамкории миёни кишварҳои мо ҳамаҷониба мусоидат намоянд. Дар идомаи сухани худ Президенти кишвар муҳтарам Эмомалӣ Раҳмон, оид ба рушду таҳкими робитаҳои дӯстӣ ва ҳамкории судманди Тоҷикистон бо кишварҳое, ки сафиронашон дар маросим иштирок доштанд, андешаронӣ намуданд. Изҳори умед карда шуд, ки талошҳои пайвастаи сафирон дар ҷодаи рушду такомули робитаҳои гуногунҷанбаи байни Тоҷикистон ва кишварҳои онҳо самараву натиҷаҳои наву нек ба бор хоҳанд овард. Дар хотима Роҳбари давлат муҳтарам Эмомалӣ Раҳмон ба сафирони нав комёбӣ хоста, ба роҳбарони давлатҳои онҳо салому паёми гарм ирсол намуданд.