Хабарҳо

27- уми майи соли 2025 бо ташаббуси Маркази исломшиносӣ дар назди Президенти Ҷумҳурии Тоҷикистон ва Кумитаи дин ва танзими ҷашну маросими назди Ҳукумати Ҷумҳурии Тоҷикистон бахшида ба 1155-солагии олими бузург, асосгузори каломи Мовароуннаҳр Абумансури Мотуридӣ дар Китобхонаи миллии Тоҷикистон Конференсияи илмӣ – назариявӣ таҳти унвони “Абумансури Мотуридӣ асосгузори каломи ақлгароӣ ва таҳаммулпазирӣ” баргузор гардид. Дар кори конференсия Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Раҳмонзода Абдуллоҳ Қурбоналӣ, директори Маркази исломшиносӣ дар назди Президенти Ҷумҳурии Тоҷикистон Холиқзода Абдураҳим Ғафор, Раиси Кумитаи дин ва танзими ҷашну маросими назди Ҳукумати Ҷумҳурии Тоҷикистон Давлатзода Сулаймон Пирхон, президенти АМИТ Хушвахтзода Қобилҷон Хушвахт, раиси Шурои уламои Маркази исломии Тоҷикистон Абдуқодирзода Саидмукаррам ва дигарон иштирок ва суханронӣ намуданд. Нахуст Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Раҳмонзода Абдуллоҳ Қурбоналӣ бо сухани ифтитоҳӣ баромад намуда, ба иштирокчиёни конфронс барору комёбӣ таманно намуд. Сипас, иштирокчиёни конфронс дар мавзуоти пешниҳоднамудаашон суханронӣ намуданд. Шуъбаи иттилоот ва ташхиси диншиносӣ

Санаи 19-уми майи соли 2025 Мирзошариф Абдусаломов – корманди Маркази исломшиносӣ дар назди Президенти Ҷумҳурии Тоҷикистон ҳамзамон, докторант PhD -и соли сеюми Институти омӯзиши масъалаҳои давлатҳои Осиё ва Аврупои Академияи миллии илмҳои Тоҷикистон дар Конфренсияи ҷумҳуриявии илмӣ-назариявӣ, ки бо ташаббуси Вазорати фарҳанги Ҷумҳурии Тоҷикистон бахшида ба Рӯзи байналмилалии осорхонаҳо, таҳти унвони “Ҳифз ва муаррифии мероси таърихию фарҳангӣ дар осорхонаҳо” баргузор гардид, иштирок намуда, дар мавзӯи “Мақоми осорхонаҳо дар самти ҳамкорӣ бо ЮНЕСКО ва ҷаҳоникунонии мероси таърихию фарҳангӣ” баромад намуд. Дар фарҷом байни иштирокчиёни конференсия табодули афкор сурат гирифт. Шуъбаи иттилоот ва ташхиси диншиносӣ

19-уми майи соли 2025 дар Муассисаи давлатии «Маркази исломшиносӣ дар назди Президенти Ҷумҳурии Тоҷикистон» ба ифтихори Рӯзи ҷавонони Тоҷикистон семинари илмӣ-назариявӣ дар мавзуи «Муҳайё кардани заминаҳо барои равнақи неруҳои ақлонӣ» баргузор гардид. Дар кори семинари мазкур мудири шуъбаи пажуҳиши анъанаву маросим ва диншиносии муқоисавии Марказ, номзади илмҳои педагогӣ Одинашоҳ Вализода вобаста ба таваҷҷуҳи доимӣ ва хизматҳои арзандаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба ҷавонони мамлакатро хотиррасон карда, иброз доштанд, ки  Пешвои миллат аз солҳои аввали соҳибистиқлолӣ, бахусус дар марҳалаи гузариш аз як низоми сиёсиву иҷтимоӣ ба низоми сифатан нави идоракунӣ нисбат ба масъалаҳои ҷавонон, аз ҷумла беҳдошти вазъи таълиму тарбия, соҳибихтисос, соҳибкасб, ба ҷойи кор таъмин гардонидан ва мавқеи хосса пайдо намудани ҷавонон дар ҷомеа таваҷҷуҳи махсус зоҳир намуда истодаанд. Кормандони Марказ андешаҳои худро вобаста ба мавзуи семинар иброз дошта, қабули фармону санадҳои қабулгардидаро дар самти дастгирии ҳамаҷонибаи ҷавонони кишвар ҷиҳати равнақи неруҳои ақлонии онҳо саривақтӣ медонанд. Бо истифода аз фурсати муносиб, ҳайати коллективи Маркази исломшиносӣ тамоми ҷавонони мамлакатро ба муносибати Рӯзи ҷавонон табрик гуфта, дар кору фаъолияташон муваффақиятҳо орзуманданд. Шуъбаи пажуҳиши анъанаву маросим ва диншиносии муқоисавӣ

16 -уми майи соли равон дар асоси Нақша – чорабиниҳои Маркази таълимии “Пойтахт”- и Қӯшунҳои сарҳадии Кумитаи давлатии амнияти миллии Ҷумҳурии Тоҷикистон дар ҳамкорӣ бо Маркази исломшиносӣ дар назди Президенти Ҷумҳурии Тоҷикистон бо мақсади баланд бардоштани сатҳи дониши хизматчиёни ҳарбии навдаъватшуда машғулияти сиёсӣ – тарбиявӣ бо ҳайати афсарону прапоршикон ва сержантону сарбозон баргузор гардид. Дар машғулияти сиёсӣ – тарбиявӣ сардори шуъбаи иттилоот ва ташхиси диншиносии Маркази исломшиносӣ дар назди Президенти Ҷумҳурии Тоҷикистон Абдуллоҳи Қодирӣ ва муовини сардори Маркази таълимии “Пойтахт”- и Қӯшунҳои сарҳадии Кумитаи давлатии амнияти миллии Ҷумҳурии Тоҷикистон подполковник Ғайратзода Амруллоҳ иштирок ва суҳбат намуданд. Дар ҷараёни машғулият Абдуллоҳи Қодирӣ дар мавзуи “ Паёмадҳои манфии худкушӣ аз назари дини мубини ислом” ва “ Ифротгароии рақамӣ дар асри иттилоот ва бархурди тамаддунҳо” суҳбат намуд. Дар фарҷом байни афсарону сарбозон табодули афкор сурат гирифт. Абдуллоҳи Қодирӣ сардори шуъбаи иттилоот ва ташхиси диншиносӣ  

Муассисаи давлатии «Маркази исломшиносӣ дар назди Президенти Ҷумҳурии Тоҷикистон» дар якҷоягӣ бо Кумитаи дин ва танзими ҷашну маросими назди Ҳукумати Ҷумҳурии Тоҷикистон рӯзи 27 майи соли 2025 конференсияи ҷумҳуриявӣ бахшида ба 1155 солагии олим, мутафаккири бузурги тоҷик таҳти унвони «Абумансури Мотуридӣ” баргузор менамояд. Дар конференсия масоили зерин баррасӣ мешаванд: • Зарурат ва аҳамияти ҷашн гирифтани 1155 солагии мутафаккири (олими) бузурги тоҷик Абумансури Мотуридӣ; • Абумансури Мотуридӣ бунёдгузори мактаби каломи Мовароуннаҳр; • Нақши каломи Мотуридӣ дар ҳифзи арзишҳою манфиатҳои миллӣ; • Масоили дунявият дар таълимоти Мотуридӣ; • Мотуридӣ пайвандгари дустии халқҳои Мовароуннаҳр; • Нақши Мотуридӣ дар рушди фарҳангу тамаддуни исломӣ; • Ақлгароӣ дар таълимоти Мотуридӣ; • Мотуридия ва усулҳои илмии худошиносӣ; • Назари Мотуридия ба фалсафаи Юнону Рими Қадим; • Нақши Мотуридӣ дар рушди фарҳангу тамадуни исломӣ; • Таълимоти Мотуридӣ дар муқобили ҳама гуна зуҳуротҳои террористӣ, ифротӣ ва хурофотии динӣ; • Мотуридия ва илми ҳуқуқ • Мотуридия ва ахлоқи башарӣ Матнҳои ирсолшуда бояд таҳрир ва ба талаботҳои техникии зерин ҷавобгӯй бошанд: ҳуруфи шакли Times New Roman (русӣ), Times New Roman Тj (тоҷикӣ) бо андозаи-14; сатри якум – номи маърӯза БО ҲАРФҲОИ КАЛОН; сатри дуюм – насаби муаллиф ҳарфи аввали ном ва номи падар, дараҷаи илмӣ, унвони илмӣ, ҷои кор (таҳсил), дар қавс шаҳр, вилоят; сатри сеюм – матни асосӣ, ки дар таҳриргарӣ матнии MS Word ҳуруфчинӣ шудааст, фосилаи байнисатрӣ – 1,5, баробаркунии матн бо паҳноии саҳифа; ҳаҷми матни маърӯза бо формула, расм, ҷадвал, рӯйхати адабиёт, аннотатсия ва калидвожаҳо набояд аз 9 саҳифа зиёд бошад; рӯйхати адабиёт дар охири матн баъд аз калимаи «АДАБИЁТ» оварда шуда, бо тартиби алифбо омода карда мешавад; ишора ба адабиёти истифодашуда дар матн ҳатмӣ буда, ба таври [3, 25] омода карда мешавад, ки дар ин ҷо рақами аввал рақами тартибии сарчашма дар рӯйхати адабиёт ва рақами дуввум саҳифаи он мебошанд. Дархост барои иштирок ва матни маърӯза бояд то санаи 15 майи соли 2025 ба Кумитаи тадорукот супорида шавад. Забони конференсия: тоҷикӣ, русӣ арабӣ ва англисӣ. Суроғаи мо: 992372 ш. Душанбе, кўчаи Шодмонї, 58/1, почтаи электронӣ, E-mail: jalolozodas@mail.ru Шахси масъул барои гирд овардани мавод – Ҷалолов Суҳроб тел: 224 09 96, 902326662 ватсап ва телеграм; 935817886

 5-уми майи 2025 аз ҷониби роҳбарияти баталиёни махсуси комендатии қисми ҳарбии 051054 Гвардияи миллии Ҷумҳурии Тоҷикистон, барои саҳми арзанда дар баланд бардоштани ҳисси миллӣ, садоқат ба халқу миллат, ватандӯстӣ ва савияи дониши афсарону сарбозони Гвардияи миллӣ Абдуллоҳи Қодирӣ-сардори шуъбаи иттилоот ва ташхиси диншиносии Маркази исломшиносӣ дар назди Президенти Ҷумҳурии Тоҷикистон бо Ифтихорнома қадрдонӣ шуд. Шуъбаи иттилоот ва ташхиси диншиносӣ

Санаи 30 – юми апрели соли 2025 дар шаҳри Самарқанди Ҷумҳурии Ӯзбекистон Конференсияи байналмилалии “Мотуридия – мактаби таҳаммулпазир, мактаби маърифат ва эътидол” ба кори худ оғоз кард. Дар кори конференсия муовини директори Маркази исломшиносӣ Ваҳобзода А. ва котиби илмии Марказ Маҳрамбеков М., ки аз тарафи Кумитаи дини назди Шурои Вазирони Ҷумҳурии Ўзбекистон ва Маркази омўзиш ва таҳқиқи осори Мотуридии назди Ҳукумати Ҷумҳурии Ўзбекистон даъват карда шуда буданд, иштирок ва суханронӣ намуданд. Ҳамчунин, ба конференсияи мазкур олимону муҳаққиқон ва коршиносони соҳаи исломшиносӣ аз 24 давлати дунё даъват карда шудаанд. Конференсияро мушовири Президенти Ҷумҳурии Ўзбекистон Русланбек Давлатов ифтитоҳ намуда, паёму табрикоти Президенти Ҷумҳурии Ўзбекистонро ба аҳли нишаст расонда, ба кори конференсия муваффақият таманно намуд. Дар қисмати ҷаласаи ифтитоҳӣ намояндагони давлатҳои Мисри Араб, Ӯзбекистон, Марокаш, Туркия, Озарбойҷон ва раиси ташкилоти исломии ICESCO суханронӣ карданд. Дар қисмати пленарӣ тибқи барнома муовини директори Маркази исломшиносӣ дар мавзўи “Хусусиятҳои мактаби каломи Мовароуннаҳр: нақши ақл ва мантиқ дар таълимоти Абумансури Мотуридӣ” маърўза кард. Зимни суханронӣ таъкид гардид, ки таълимоти Абумансури Мотуридӣ беш аз 1100- сол инҷониб мардумро муттаҳид сохта, заминаи мусоид барои ҳифзи пояҳои давлатдорӣ ва арзишҳои миллӣ арзёбӣ мегардад. Дар интиҳои баромади худ муовини директори Марказ даъват ба амал оварданд, ки дар шароити ҷаҳонишавӣ, баҳри пешгирии ихтилофоти мазҳабӣ ва ифротгароии динӣ ҳамагонро лозим аст, ба таълимоти Абумансури Мотуридӣ рўй оваранд. Зеро мактаби каломи Мотуридӣ ба тамоми равия мазҳаб ва фирқаҳои исломӣ арҷ гузошта, дар ин таълимот омилҳои барангезандаи ифрот ҷой надоранд. Инро таҷрибаи беш аз ҳазорсола собит сохтааст. Сипас, баъди нисфирўзӣ идомаи конференсия дар сессияҳои алоҳида баргузор гардид. Тибқи барнома дар сессияи сеюм котиби илмии Марказ Маҳрамбеков М. дар бораи “Тавсифи китоби Пандномаи Мотуридӣ” суханронӣ кард. Дар рафти гузориш таъкид гардид, ки дар баробари дигар мероси Мотуридӣ “Панднома” ягона китоби муаллиф ба забони тоҷикӣ мебошад. Ин китоб аз аввал ба номи Мотуридӣ мансуб дониста шуда буд, ҳарчанд баъзе муҳақкиқон мансуб будани онро ба Мотуридӣ қабул надоштанд. Вале дар китобҳои дигари муаллиф низ калимаҳои тоҷикӣ зиёд истифода шудаанд ва ин бори дигар собит намуд, ки муаллиф бо забони тоҷикӣ пурра шинос будааст. Зеро масъалаи мансубияти Мотуридӣ ба ин ё он миллат низ масъалаи баҳсбарагез буда, дар ин маврид низ фикрҳои зиёд мавҷуданд. Дар идома ба иттилои иштироккунандагон расонида шуд, ки бо ташаббуси Ҳукумати Ҷумҳурии Тоҷикистон, аз ҷониби Маркази исломшиносӣ китоби “Тавҳид” ва “Панднома”-и Имом Мотуридӣ таҳқиқ ва ба забони тоҷикӣ тарҷума шуда, дар ҳамоиши илмӣ бахшида ба таҷлили 1150 – солагии муаллиф ба мухлисон тақдим мегардад. Кори конференсия идома дорад… Шуъбаи иттилоот ва ташхиси диншиносӣ

Санаи 1- уми майи 2025 дар баталёни махсуси комендантии қисми ҳарбии  051054 Гвардияи миллии Ҷумҳурии Тоҷикистон бо мақсади баланд бардоштани ҳисси миллӣ, садоқат ба халқу миллат, муносибатҳои    байниҳамдигарӣ , интизоми ҳарбӣ, даст назадан ба худкушӣ ва пешгирии шомилшавии ҷавонон ба ҳаргуна ҳизбу ҳаракатҳои экстремистию террористӣ, инчунин баланд бардоштани савияи дониши афсарону сарбозони  Гвардияи миллӣ дарси хониши сиёсӣ баргузор гардид. Дар чорабинии мазкур сардори шуъбаи иттилоот ва ташхиси диншиносии Маркази исломшиносӣ дар назди Президенти Ҷумҳурии Тоҷикистон Абдуллоҳи Қодирӣ иштирок ва дар мавзуи ” Ифротгароии рақамӣ” ва ” Худкушӣ ва сӯиқасд ба ҷони худ ҳаром аст”, баромад намуд. Ӯ аз ҷумла иброз дошт: Бо рушди бесобиқаи технологияҳои иттилоотӣ ва паҳншавии интернет, фазои рақамӣ ба яке аз муҳитҳои калидии мубориза барои мағзи афкори ҷомеъа табдил ёфтааст. Имрӯз шабакаҳои иҷтимоӣ, сомонаҳои хабарии ғайрирасмӣ ва платформаҳои паёмрасонӣ (мессенҷерҳо) ба воситаи васоити фавқулодда дастрас ва таъсиргузор табдил ёфта, ба воситаи онҳо паёмҳои таблиғотии гурӯҳҳои ифротӣ ба таври системавӣ ва ҳадафнок ба гурӯҳҳои муайяни аҳолӣ, махсусан ҷавонон равона мегарданд. Ҷалби онҳо ба гурӯҳҳои террористӣ бо истифодаи забони содда, тарҳҳои ҷаззоб, мусиқӣ ва видеоҳои эмотсионалӣ сурат мегирад, ки ин раванд шиносоӣ ва фаҳми нодурусти мазмунро душвор месозад. Илова бар ин, гурӯҳҳои ифротӣ аз имкониятҳои афзояндаи шабакаҳои торик (dark web), паёмрасонҳои рамзгузоришуда ва платформаҳои махфӣ истифода мебаранд, ки назорат ва маҳдудсозии онҳо  мушкил мегардад. Дар натиҷа, таблиғоти экстремистӣ шаклҳои нави рақамиро касб намуда, ба як мушкилии ҷиддӣ ба амнияти миллии кишварҳо ва суботи ҷомеаи ҷаҳонӣ таъсири манфӣ мерасонад. Ҳамин омил зарурати муборизаи ҳамаҷониба, қотеъона ва ҳамоҳангшударо дар сатҳи миллӣ, минтақавӣ ва байналмилалӣ ба миён овардааст, ки дар он на танҳо мақомоти ҳифзи ҳуқуқ, балки тамоми сохторҳои ҷомеа, аз ҷумла ВАО, муассисаҳои таълимӣ, таҳлилгарон ва корбарони оддӣ нақши фаъол мебозанд. Дар идома А.Қодирӣ оид ба худкушӣ суҳбат намуда, андешаҳои худро чунин иброз дошт: яке аз масъалаҳои доғи рӯзи ҷомеаи муосир масъалаи худкушӣ ба ҳисоб меравад. Дар тӯли таърих ҷомеаи башарӣ ба намудҳои гуногуни он рӯ ба рӯ шудааст. Ҳар як инсони оқилу солимфикр бояд бидонад, ки ҳаёти одамӣ беҳтарин ва бузургтарин неъмати Парвардигор аст. Вале, афсӯс нафароне ҳастанд, ки ба ин неъмати бузург ношукрӣ намуда, даст ба худкушӣ мезананд ва ба амонати илоҳӣ хиёнат менамоянд. Бо ин васила на фақат худ балки аҳлу оила ва тамоми  наздиконашонро сархам мекунанд. Инсон на фақат ҳақ надорад, ки ҷони худро аз байн бубарад, балки барояш воҷиб аст то онро посдорӣ ва ҳифз намояд. Дар фарҷом байни афсарону сарбозон  табодули афкор сурат гирифт. Шуъбаи иттилоот ва ташхиси диншиносӣ

Санаи 24-уми апрели соли 2025 бо ташаббуси Прокуратураи генералии Ҷумҳурии Тоҷикистон, дар Китобхонаи миллии Тоҷикистон Конференсияи ҷумҳуриявӣ оид ба “Барномаҳои давлатии Ҷумҳурии Тоҷикистон дар пешгирии экстремизм, терроризм ва татбиқи қатъномаи Созмони Милали Муттаҳид” баргузор гардид. Дар конференсияи мазкур олимону муҳаққиқон, коршиносон аз вазорату идораҳо, муассисаҳои давлатӣ, ташкилотҳои байналмиллалӣ, шарикони рушд ва донишгоҳу донишкадаҳои олии кишвар ширкат варзида, доир ба пешгирии экстремизм, тероризм ва оқибатҳои он баромад намуданд. Дар кори конференсия директори Муассисаи давлатии “Маркази исломшиносӣ дар назди Президенти Ҷумҳурии Тоҷикистон” доктори илмҳои ҳуқуқ, профессор Холиқзода Абдураҳим иштирок ва дар мавзӯи “Нақши ислом ва ташкилотҳои динӣ дар пешгирии фаъолияти тундгароӣ ва экстремизми динӣ” баромад намуд. Зимни баромад Абдураҳим Холиқзода қайд карданд, ки “Дин ва иттиҳодияҳои динӣ, хоссатан исломӣ мутобиқ ба сарчашмаҳои илмӣ ва таҷрибавӣ на танҳо имкон доранд пешгирии ифрот ва террорро дар фаъолияти рӯзмарраи худ ама  лӣ намоянд, балки бештар аз он вазифадоранд, ки ҳамчун ҷузъи рисолати эътиқодӣ, созандагӣ ва тарбиявии худ пайваста ин амалро анҷом диҳанд”. Пас аз ироаи маърузаҳо аз ҷониби иштирокдорони конференсия пешниҳодҳои судманд баён карда шуд.     ШУЪБАИ ИТТИЛООТ ВА ТАШХИСИ ДИНШИНОСӢ

Муҳтарам Азизӣ Абдуҷаббор Абдуқаҳҳор ! Бо камоли эҳтирому самимият, роҳбарияти Маркази исломшиносӣ дар назди Президенти Ҷумҳурии Тоҷикистон, Шуморо ба муносибати Рӯзи фархундаи мавлудатон самимона табрику таҳният гуфта, бароятон пеш аз ҳама саломатии ҳамешагӣ ва саодати рӯзгорро таманно менамояд. Саҳми Шумо ҳамчун фарзанди содиқи Ватан ва сиёсатмадори варзида дар пешрафту ободии кишвар ва рушди соҳаҳои гуногун ниҳоят бузург аст. Зеро аз аввалин рӯзҳои Истиқлол Шумо, муҳтарам Азизӣ Абдуҷаббор Абдуқаҳҳор, дар паҳлӯи Пешвои муаззами миллат барои тарғиб ва татбиқи ҳадафҳои созандаи абармарди сиёсат, муҳтарам Эмомалӣ Раҳмон содиқона фаъолият намудед ва ба боварии халқу Ватан сазовор шудед. Аз инҷост, ки шахсият ва корномаи Шумо намунаи равшани худшиносиву ватандӯстӣ ва намоди садоқат ба Президенти кишвар ва миллату давлат эътироф гардидааст. Бигзор ҳамеша саломату сарбаланд ва саодатманду комёб бимонед, устоди гиромӣ Азизӣ Абдуҷаббор Абдуқаҳҳор ! Саноӣ барҳақ гуфтааст: Солҳо бояд, ки то як санги аслӣ з-офтоб, Лаъл гардад дар Бадахшон ё ақиқ андар Яман. Умрҳо бояд, ки то як кӯдаке аз рӯйи табъ, Олиме гардад наку ё шоире ширинсухан. Зодрӯз муборак бод ! Бо эҳтиром, Холиқзода А.Ғ. Диретори “Маркази исломшиносӣ дар назди Президенти Ҷумҳурии Тоҷикистон”