Хабарҳо

6 – уми апрели соли равон мулоқоти Наҷотзода Мутеъулло – сармутахассиси шуъбаи пажӯҳиши ҳуқуқи исломӣ бо ҳайати шахсии наваскарони қисми ҳарбии 6593 Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон баргузор гардид. Дар мулоқот Наҷотзода Мутеъулло – сармутахассиси шуъбаи пажӯҳиши ҳуқуқи исломӣ, номзади филология иштирок намуда, ҷиҳати пешгирии қонуншиканӣ ва ҷиноят дар байни ҳайати шахсӣ дар мавзӯи “Хизмат ба Ватан шараф аст” ва “Манъи худкушӣ аз нигоҳи дини мубини ислом” маърӯза намуд. Дар фарҷом байни афсарону сарбозон вобаста ба мавзуоти баррасишуда табодули афкор сурат гирифт. Шуъбаи иттилоот ва ташхиси диншиносӣ

Бо мақсади рушди тафаккури мантиқӣ, баланд бардоштани сатҳи зеҳнии кормандон ва тарғиби тарзи ҳаёти солим, аз санаи 02.03.2026 то 06.04.2026 дар асоси фармоиши директори Марказ доктори илмҳои ҳуқуқшиносӣ, профессор Холиқзода А.Ғ. дар Маркази исломшиносӣ дар назди Президенти Ҷумҳурии Тоҷикистон миёни кормандон мусобиқаи варзишӣ аз рӯйи намудҳои тениси рӯимизӣ, шоҳмот ва шашка баргузор гардид. Дар мусобиқа кормандон фаъолона ширкат варзида, маҳорати баланди зеҳнӣ ва қобилияти баланд нишон доданд. Раванди мусобиқа дар фазои дӯстона ва рақобати солим сурат гирифта, иштирокчиён бо эҳтироми якдигар ва риояи қоидаҳои бозӣ ҳунари худро санҷиданд. Мусобиқаи варзишии мазкур, бахшида ба сазовор ҷашн гирифтани 35-солагии Истиқлоли давлатӣ, соли 2026 – «Соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ», ҷашни байналмилалии Наврӯз, ҷиҳати оммавигардонии варзиш, нишон додани сатҳи баланди маҳорати зеҳнӣ, малакаи хуби варзишӣ, мустаҳкам намудани робитаи дӯстӣ миёни кормандони Марказ баргузор гардид. Баъди муайян шудани ғолибон ва иштирокчиёни фаъол аз ҷониби роҳбарият диплом, сипоснома ва мукофотпулӣ супорида шуд. Дар фарҷом таъкид гардид, ки чунин чорабиниҳо барои рушди зеҳнии кормандон, таҳкими дӯстӣ ва оммавигардонии варзиш нақши муҳим дошта, дар оянда низ мунтазам баргузор хоҳанд шуд. Шуъбаи иттилоот ва ташхиси диншиносӣ

10-уми апрели соли равон, дар Қӯшунҳои сарҳадии Кумитаи давлатии амнияти миллии Ҷумҳурии Тоҷикистон машғулияти сиёсӣ бо афсарону сарбозон ва ҳайати шахсӣ баргузор гардид. Дар машғулият сардори шуъбаи итилоот ва ташхиси диншиносии Маркази исломшиносӣ дар назди Президенти Ҷумҳурии Тоҷикистон Абдуллоҳи Қодирӣ иштирок ва дар мавзуоти зерин: “Роҳу воситаҳои такмил ва таҳкими корҳои сиёсӣ – тарбиявии афсарону сарбозони Қӯшунҳои сархадӣ” ва “Тарбияи ҷавонон дар рӯҳияи ватандӯстӣ ва эҳтиром ба арзишҳои миллӣ” маърӯза намуд. Дар фарҷом байни афсарону сарбозон табодули афкор сурат гирифт. Шуъбаи иттилоот ва ташхиси диншиносӣ

Маркази исломшиносӣ дар назди Президенти Ҷумҳурии Тоҷикистон тибқи Нақшаи чорабиниҳо оид ба татбиқи Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030 санаи 9-уми апрели соли 2026, бо иштироки намояндагони Агентии назорати давлатии молиявӣ ва мубориза бо коррупсияи Ҷумҳурии Тоҷикистон Зокирзода Ваҳоб, Сафарзода Шодӣ хониши идоравиро баргузор намуд. Ҷамъомади мазкурро директори Маркази исломшиносӣ дар назди Президенти Ҷумҳурии Тоҷикистон доктори илмҳои ҳуқуқшиносӣ, профессор Холиқзода Абдураҳим Ғафор оғоз карда, кормандони Марказро бо рӯзномаи хониши идоравӣ шинос намуда, вобаста ба амалисозии Стратегияи мазкур дар Марказ ва корҳои анҷомдода оид ба пешгирии омилҳои коррупсионӣ андешаронӣ намуда, суханро ба намояндаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон Зокирзода Ваҳҳоб доданд. Мавсуф, дар бораи мазмуну мундариҷаи Стратегияи номбурда маълумоту муфассал дода, аз ҷумла қаӣд карданд, ки ҳадафи асосии он таъмини шаффофият, масъулиятнокӣ ва самаранокии фаъолияти давлатӣ ва ҷамъиятӣ буда, чораҳои муассирро бобати пешгирӣ, ошкор ва коҳиш додани коррупсия роҳандозӣ менамояд. Коррупсия зуҳуроте номатлубест, ки эътимоди мардумро ба давлат коста гардонида, обрӯву эътибори онро коҳиш медиҳад ва боиси поймолшавии ҳуқуқи инсон ва заиф шудани пояҳои ахлоқии ҷомеа мегардад. Аз ҷумла дар бораи бандҳои алоҳидаи ҳуҷҷати мазкур андешаронӣ карда, қаӣд карданд, ки ба ҳамаи мо зарур аст, ки ҷиҳати пешгирии амалҳои коррупсионӣ, риоя ва амалисозии санадҳои меъёрии ҳуқуқии вобаста ба масъалаи мазкур, тартиботи ҳуқуқӣ, рушди фарҳанги зиддикоррупсионӣ дар ҷомеа, баланд бардоштани сатҳи огоҳии шаҳрвандон дар якҷоягӣ чораҳои зарурӣ андешем. Ҳамчунин, оид ба баргузории чорабиниҳои тарғиботию ташвиқотӣ, мулоқоту вохӯриҳо, таҳия ва чопи мақолаҳо, баромаду суханронӣ дар барномаҳои воситаҳои ахбори омма, пардохти хизматрасониҳои давлатӣ тавассути низоми электронӣ, баргузор намудани таҳқиқоти сотсиологӣ вобаста ба масъалаҳои коррупсионӣ андешаронӣ намуд. Дар фарҷом саволу ҷавоб доир гардида, кормандон ба саволҳои худ посухҳои асоснок гирифтанд. Чорабинии мазкурро директори Маркази исломшиносӣ дар назди Президенти Ҷумҳурии Тоҷикистон доктори илмҳои ҳуқуқшиносӣ, профессор Холиқзода Абдураҳим ҷамъбаст намуда, ҷиҳати татбиқи Стратегияи давлатии муқовимат ба коррупсия дар Ҷумҳурии Тоҷикистон дар соли 2026 аз ҷониби Марказ тадбирҳои судманд андешида мешавад. Шуъбаи иттилоот ва ташхиси диншиносӣ

Санаи 6-уми апрели соли равон дар Маркази исломшиносӣ дар назди Президенти Ҷумҳурии Тоҷикистон ҷаласаи ҷамъбасти фаъолияти илмию таҳқиқотӣ ва таҳлилию таблиғотӣ дар семоҳаи аввали соли 2026 баргузор гардид. Дар ҷаласаи ҷамъбастӣ директори Марказ доктори илмҳои ҳуқуқшиносӣ, профессор Холиқзода А.Ғ., муовинон ва ҳайати кормандони Марказ иштирок намуданд. Ҷаласаро директори Марказ Холиқзода А.Ғ., ифтитоҳ намуда, қайд карданд, ки Марказ тибқи дастури Ҳукумати Ҷумҳурии Тоҷикистон аз 16.03.2026, № 22/1028 “Дар бораи ҷамъбасти натиҷаҳои рушди иҷтимоию иқтисодии Ҷумҳурии Тоҷикистон дар семоҳаи якуми соли 2026 ва вазифаҳо барои то охири соли 2026”, оид ба фаъолияти илмию таҳқиқотӣ ва таҳлилию таблиғотӣ дар семоҳаи аввали соли 2026 баргузор менамояд. Директори Марказ иброз намуд, ки мувофиқи талаботи муқарраргардида натиҷаи корҳои анҷомдодашуда, қаблан дар шуъбаҳо муҳокима шуданд. Бинобар ин, айни замон котиби илмии Марказ Маҳармбеков М.А., гузориш аз рафти фаъолияти семоҳаро пешниҳод менамояд. Сипас котиби илмии Марказ Маҳрамбеков М.А. оид ба фаъолияти илмию таҳқиқотӣ ва таҳлилию таблиғотӣ дар семоҳаи аввали соли 2026 ҳисобот дод. Дар ҳисобот қайд гардид, ки Марказ ҳамчун ниҳоди илмӣ-таҳқиқотӣ дар соли 2026 мавзуи “Масъалаҳои ташаккули тафаккури муосири миллӣ дар ҷомеа ва таъмини ҳамзистии арзишҳо: заминаҳои таърихӣ, ҳуқуқӣ, эътиқодӣ, сиёсӣ, ахлоқӣ ва фарҳангӣ”- ро, ки зермавзуи Марказ барои солҳои 2023-2026: “Таъсири омили динӣ дар шароити муосир ва бозтоби он дар раванди ташаккули давлатдории миллӣ-дунявӣ: дурнамои ҳамгироӣ, имкониятҳо ва таҳдидҳо” мебошад, мавриди таҳқиқ қарор додааст. Инчунин, Марказ нақшаи кори иҷрои барномаҳои илмӣ дар мавзуъҳои “Ҳаракатҳои тундгаро ва ифротгаро дар ислом: таҳавулот ва хатари онҳо ба давлатдории миллӣ” (барои солҳои 2026-2030) ва “Ҳуқуқ ба озодии эътиқод ва ҳифзи он аз зуҳуроти ифротгароӣ ва терроризм: модели исломи анъанавӣ дар шароити давлати дунявӣ” (барои давраи солҳои 2026-2030) -ро таҳия ва тасдиқ намудааст, ки айни замон мавриди таҳқиқот қарор доранд. Дар давраи ҳисоботӣ Марказ натиҷаи корҳои таҳқиқотиро дар шакли мақолаву монографияҳои зерин ба чоп расонид: 3-монографияҳо: 1. Заруриёти диния. –Душанбе: “Эр-граф”, 2026. -122 с. 2. Маҳмудзода М.А., Холиқзода А. Ғ., Искандаров З.Ҳ., Шарофзода Р.Ш., Мирализода И.Қ., Зиёзода Т.Н. Ҳуқуқи инсон. Китоби дарсӣ барои синфи 11-уми муассисаҳои таҳсилоти умумӣ. – Душанбе: “Маориф”, 2025. – 208 с. 3. Холикзода А.Г. Арийская цивилизация и правовоя традиция таджикского народа. Монографическое иследование. – Душанбе: Балогат, 2026. – 88 с. Котиби илмии Марказ ҳамчунин, қайд намуд, ки ҳарчанд нақшаҳои корӣ иҷро шуда бошанд ҳам, вале тақвият бахшидани баъзе самтҳои корҳои илмӣ-таҳқиқотӣ зарур мебошад. Директори Марказ таъкид намуд, ки нақшаҳои корӣ бояд дар вақташ иҷро гардида, натиҷаи корҳо бояд дар шакли мақолаҳо ва монографияҳо ба чоп расонида шаванд. Дар хотима директори Марказ пешниҳод намуд, ки бо назардошти фикру пешниҳодҳо матни ниҳоии ҳисобот омода карда шавад. Шуъбаи иттилоот ва ташхиси диншиносӣ