Хабарҳо

Санаи 30 – юми апрели соли 2025 дар шаҳри Самарқанди Ҷумҳурии Ӯзбекистон Конференсияи байналмилалии “Мотуридия – мактаби таҳаммулпазир, мактаби маърифат ва эътидол” ба кори худ оғоз кард. Дар кори конференсия муовини директори Маркази исломшиносӣ Ваҳобзода А. ва котиби илмии Марказ Маҳрамбеков М., ки аз тарафи Кумитаи дини назди Шурои Вазирони Ҷумҳурии Ўзбекистон ва Маркази омўзиш ва таҳқиқи осори Мотуридии назди Ҳукумати Ҷумҳурии Ўзбекистон даъват карда шуда буданд, иштирок ва суханронӣ намуданд. Ҳамчунин, ба конференсияи мазкур олимону муҳаққиқон ва коршиносони соҳаи исломшиносӣ аз 24 давлати дунё даъват карда шудаанд. Конференсияро мушовири Президенти Ҷумҳурии Ўзбекистон Русланбек Давлатов ифтитоҳ намуда, паёму табрикоти Президенти Ҷумҳурии Ўзбекистонро ба аҳли нишаст расонда, ба кори конференсия муваффақият таманно намуд. Дар қисмати ҷаласаи ифтитоҳӣ намояндагони давлатҳои Мисри Араб, Ӯзбекистон, Марокаш, Туркия, Озарбойҷон ва раиси ташкилоти исломии ICESCO суханронӣ карданд. Дар қисмати пленарӣ тибқи барнома муовини директори Маркази исломшиносӣ дар мавзўи “Хусусиятҳои мактаби каломи Мовароуннаҳр: нақши ақл ва мантиқ дар таълимоти Абумансури Мотуридӣ” маърўза кард. Зимни суханронӣ таъкид гардид, ки таълимоти Абумансури Мотуридӣ беш аз 1100- сол инҷониб мардумро муттаҳид сохта, заминаи мусоид барои ҳифзи пояҳои давлатдорӣ ва арзишҳои миллӣ арзёбӣ мегардад. Дар интиҳои баромади худ муовини директори Марказ даъват ба амал оварданд, ки дар шароити ҷаҳонишавӣ, баҳри пешгирии ихтилофоти мазҳабӣ ва ифротгароии динӣ ҳамагонро лозим аст, ба таълимоти Абумансури Мотуридӣ рўй оваранд. Зеро мактаби каломи Мотуридӣ ба тамоми равия мазҳаб ва фирқаҳои исломӣ арҷ гузошта, дар ин таълимот омилҳои барангезандаи ифрот ҷой надоранд. Инро таҷрибаи беш аз ҳазорсола собит сохтааст. Сипас, баъди нисфирўзӣ идомаи конференсия дар сессияҳои алоҳида баргузор гардид. Тибқи барнома дар сессияи сеюм котиби илмии Марказ Маҳрамбеков М. дар бораи “Тавсифи китоби Пандномаи Мотуридӣ” суханронӣ кард. Дар рафти гузориш таъкид гардид, ки дар баробари дигар мероси Мотуридӣ “Панднома” ягона китоби муаллиф ба забони тоҷикӣ мебошад. Ин китоб аз аввал ба номи Мотуридӣ мансуб дониста шуда буд, ҳарчанд баъзе муҳақкиқон мансуб будани онро ба Мотуридӣ қабул надоштанд. Вале дар китобҳои дигари муаллиф низ калимаҳои тоҷикӣ зиёд истифода шудаанд ва ин бори дигар собит намуд, ки муаллиф бо забони тоҷикӣ пурра шинос будааст. Зеро масъалаи мансубияти Мотуридӣ ба ин ё он миллат низ масъалаи баҳсбарагез буда, дар ин маврид низ фикрҳои зиёд мавҷуданд. Дар идома ба иттилои иштироккунандагон расонида шуд, ки бо ташаббуси Ҳукумати Ҷумҳурии Тоҷикистон, аз ҷониби Маркази исломшиносӣ китоби “Тавҳид” ва “Панднома”-и Имом Мотуридӣ таҳқиқ ва ба забони тоҷикӣ тарҷума шуда, дар ҳамоиши илмӣ бахшида ба таҷлили 1150 – солагии муаллиф ба мухлисон тақдим мегардад. Кори конференсия идома дорад… Шуъбаи иттилоот ва ташхиси диншиносӣ

Санаи 1- уми майи 2025 дар баталёни махсуси комендантии қисми ҳарбии  051054 Гвардияи миллии Ҷумҳурии Тоҷикистон бо мақсади баланд бардоштани ҳисси миллӣ, садоқат ба халқу миллат, муносибатҳои    байниҳамдигарӣ , интизоми ҳарбӣ, даст назадан ба худкушӣ ва пешгирии шомилшавии ҷавонон ба ҳаргуна ҳизбу ҳаракатҳои экстремистию террористӣ, инчунин баланд бардоштани савияи дониши афсарону сарбозони  Гвардияи миллӣ дарси хониши сиёсӣ баргузор гардид. Дар чорабинии мазкур сардори шуъбаи иттилоот ва ташхиси диншиносии Маркази исломшиносӣ дар назди Президенти Ҷумҳурии Тоҷикистон Абдуллоҳи Қодирӣ иштирок ва дар мавзуи ” Ифротгароии рақамӣ” ва ” Худкушӣ ва сӯиқасд ба ҷони худ ҳаром аст”, баромад намуд. Ӯ аз ҷумла иброз дошт: Бо рушди бесобиқаи технологияҳои иттилоотӣ ва паҳншавии интернет, фазои рақамӣ ба яке аз муҳитҳои калидии мубориза барои мағзи афкори ҷомеъа табдил ёфтааст. Имрӯз шабакаҳои иҷтимоӣ, сомонаҳои хабарии ғайрирасмӣ ва платформаҳои паёмрасонӣ (мессенҷерҳо) ба воситаи васоити фавқулодда дастрас ва таъсиргузор табдил ёфта, ба воситаи онҳо паёмҳои таблиғотии гурӯҳҳои ифротӣ ба таври системавӣ ва ҳадафнок ба гурӯҳҳои муайяни аҳолӣ, махсусан ҷавонон равона мегарданд. Ҷалби онҳо ба гурӯҳҳои террористӣ бо истифодаи забони содда, тарҳҳои ҷаззоб, мусиқӣ ва видеоҳои эмотсионалӣ сурат мегирад, ки ин раванд шиносоӣ ва фаҳми нодурусти мазмунро душвор месозад. Илова бар ин, гурӯҳҳои ифротӣ аз имкониятҳои афзояндаи шабакаҳои торик (dark web), паёмрасонҳои рамзгузоришуда ва платформаҳои махфӣ истифода мебаранд, ки назорат ва маҳдудсозии онҳо  мушкил мегардад. Дар натиҷа, таблиғоти экстремистӣ шаклҳои нави рақамиро касб намуда, ба як мушкилии ҷиддӣ ба амнияти миллии кишварҳо ва суботи ҷомеаи ҷаҳонӣ таъсири манфӣ мерасонад. Ҳамин омил зарурати муборизаи ҳамаҷониба, қотеъона ва ҳамоҳангшударо дар сатҳи миллӣ, минтақавӣ ва байналмилалӣ ба миён овардааст, ки дар он на танҳо мақомоти ҳифзи ҳуқуқ, балки тамоми сохторҳои ҷомеа, аз ҷумла ВАО, муассисаҳои таълимӣ, таҳлилгарон ва корбарони оддӣ нақши фаъол мебозанд. Дар идома А.Қодирӣ оид ба худкушӣ суҳбат намуда, андешаҳои худро чунин иброз дошт: яке аз масъалаҳои доғи рӯзи ҷомеаи муосир масъалаи худкушӣ ба ҳисоб меравад. Дар тӯли таърих ҷомеаи башарӣ ба намудҳои гуногуни он рӯ ба рӯ шудааст. Ҳар як инсони оқилу солимфикр бояд бидонад, ки ҳаёти одамӣ беҳтарин ва бузургтарин неъмати Парвардигор аст. Вале, афсӯс нафароне ҳастанд, ки ба ин неъмати бузург ношукрӣ намуда, даст ба худкушӣ мезананд ва ба амонати илоҳӣ хиёнат менамоянд. Бо ин васила на фақат худ балки аҳлу оила ва тамоми  наздиконашонро сархам мекунанд. Инсон на фақат ҳақ надорад, ки ҷони худро аз байн бубарад, балки барояш воҷиб аст то онро посдорӣ ва ҳифз намояд. Дар фарҷом байни афсарону сарбозон  табодули афкор сурат гирифт. Шуъбаи иттилоот ва ташхиси диншиносӣ

Санаи 24-уми апрели соли 2025 бо ташаббуси Прокуратураи генералии Ҷумҳурии Тоҷикистон, дар Китобхонаи миллии Тоҷикистон Конференсияи ҷумҳуриявӣ оид ба “Барномаҳои давлатии Ҷумҳурии Тоҷикистон дар пешгирии экстремизм, терроризм ва татбиқи қатъномаи Созмони Милали Муттаҳид” баргузор гардид. Дар конференсияи мазкур олимону муҳаққиқон, коршиносон аз вазорату идораҳо, муассисаҳои давлатӣ, ташкилотҳои байналмиллалӣ, шарикони рушд ва донишгоҳу донишкадаҳои олии кишвар ширкат варзида, доир ба пешгирии экстремизм, тероризм ва оқибатҳои он баромад намуданд. Дар кори конференсия директори Муассисаи давлатии “Маркази исломшиносӣ дар назди Президенти Ҷумҳурии Тоҷикистон” доктори илмҳои ҳуқуқ, профессор Холиқзода Абдураҳим иштирок ва дар мавзӯи “Нақши ислом ва ташкилотҳои динӣ дар пешгирии фаъолияти тундгароӣ ва экстремизми динӣ” баромад намуд. Зимни баромад Абдураҳим Холиқзода қайд карданд, ки “Дин ва иттиҳодияҳои динӣ, хоссатан исломӣ мутобиқ ба сарчашмаҳои илмӣ ва таҷрибавӣ на танҳо имкон доранд пешгирии ифрот ва террорро дар фаъолияти рӯзмарраи худ ама  лӣ намоянд, балки бештар аз он вазифадоранд, ки ҳамчун ҷузъи рисолати эътиқодӣ, созандагӣ ва тарбиявии худ пайваста ин амалро анҷом диҳанд”. Пас аз ироаи маърузаҳо аз ҷониби иштирокдорони конференсия пешниҳодҳои судманд баён карда шуд.     ШУЪБАИ ИТТИЛООТ ВА ТАШХИСИ ДИНШИНОСӢ

Муҳтарам Азизӣ Абдуҷаббор Абдуқаҳҳор ! Бо камоли эҳтирому самимият, роҳбарияти Маркази исломшиносӣ дар назди Президенти Ҷумҳурии Тоҷикистон, Шуморо ба муносибати Рӯзи фархундаи мавлудатон самимона табрику таҳният гуфта, бароятон пеш аз ҳама саломатии ҳамешагӣ ва саодати рӯзгорро таманно менамояд. Саҳми Шумо ҳамчун фарзанди содиқи Ватан ва сиёсатмадори варзида дар пешрафту ободии кишвар ва рушди соҳаҳои гуногун ниҳоят бузург аст. Зеро аз аввалин рӯзҳои Истиқлол Шумо, муҳтарам Азизӣ Абдуҷаббор Абдуқаҳҳор, дар паҳлӯи Пешвои муаззами миллат барои тарғиб ва татбиқи ҳадафҳои созандаи абармарди сиёсат, муҳтарам Эмомалӣ Раҳмон содиқона фаъолият намудед ва ба боварии халқу Ватан сазовор шудед. Аз инҷост, ки шахсият ва корномаи Шумо намунаи равшани худшиносиву ватандӯстӣ ва намоди садоқат ба Президенти кишвар ва миллату давлат эътироф гардидааст. Бигзор ҳамеша саломату сарбаланд ва саодатманду комёб бимонед, устоди гиромӣ Азизӣ Абдуҷаббор Абдуқаҳҳор ! Саноӣ барҳақ гуфтааст: Солҳо бояд, ки то як санги аслӣ з-офтоб, Лаъл гардад дар Бадахшон ё ақиқ андар Яман. Умрҳо бояд, ки то як кӯдаке аз рӯйи табъ, Олиме гардад наку ё шоире ширинсухан. Зодрӯз муборак бод ! Бо эҳтиром, Холиқзода А.Ғ. Диретори “Маркази исломшиносӣ дар назди Президенти Ҷумҳурии Тоҷикистон”

16-уми апрели соли 2025 Директори Муассисаи давлатии “Маркази исломшиносӣ дар назди Президенти Ҷумҳурии Тоҷикистон” Абдураҳим Холиқзода, дар ҳузури намояндаи Вазорати корҳои хориҷӣ Икромов Манучеҳр ва намояндагони Марказ, сафири фавқулодда ва мухтори Шоҳигарии Арабистони Саудӣ дар Ҷумҳурии Тоҷикистон Валид ибни Абдурраҳмон Ар-Решайдонро ба ҳузур пазируфт. Дар раванди мулоқот, ки дар фазои озод, дӯстона ва созанда баргузор гардид, ҷонибҳо дурнамои ҳамкориҳои мутақобилан судмандро мавриди баррасӣ қарор доданд. Дар анҷоми мулоқот ҷонибҳо аз муносибати имрӯзаи миёни Тоҷикистону Арабистони Саудӣ изҳори қаноатмандӣ намуданд ва зикр карданд, ки дар натиҷаи муносибаи дӯстонаи ду кишвар муносибатҳои судманд мунтазам рушд ёфта, заминаи ҳуқуқии робитаҳои ду кишвари бо ҳам дӯст, дар минбаъда низ таҳким меёбанд. Шуъбаи иттилоот ва ташхиси диншиносӣ  

  Дар асоси нақшаи Кумитаи иҷроияи Ҳаракати ваҳдати миллӣ ва эҳёи Тоҷикистон 10-уми апрели соли 2025 ду вохӯрӣ бо сокинону фаъолони ноҳияи Рӯдакӣ дар мавзуи «Бегонапарастӣ ва майл ба он – омили манфӣ ва зараррасон ба иттиҳоду ҳамбастагии миллӣ» баргузор гардид. Қисми якуми вохӯрӣ дар толори Муассисаи таҳсилоти миёнаи умумии №35-и деҳаи Шаҳристони ҷамоати деҳоти Гулистони ноҳияи Рӯдакӣ гузаронда шуд. Ҷаласаро раиси ноҳияи Рӯдакӣ Абдуғаффор Ҳикматулло ҳусни ифтитоҳ бахшид. Тибқи барнома дар назди ҳозирин раиси Кумитаи иҷроияи Ҳаракати ваҳдати миллӣ ва эҳёи Тоҷикистон, номзади илмҳои филологӣ -Рудобаи Мукаррам, муовини вазири фарҳанги Ҷумҳурии Тоҷикистон, Шоири халқии Тоҷикистон – Давлат Сафар, муовини раиси Кумитаи кор бо занон ва оилаи назди Ҳукумати Ҷумҳурии Тоҷикистон – Чаманоро Одиназода, директори Муассисаи давлатии «Маркази исломшиносӣ дар назди Президенти Ҷумҳурии Тоҷикистон» доктори илмҳои ҳуқуқшиносӣ, профессор Абдураҳим Холиқзода дар доираи мавзуи пешниҳодгардида андешаҳои худро иброз доштанд. Аз ҷумла, профессор Абдураҳим Холиқзода таъкид доштанд, ки тамоми донишмандону бузургони миллати тоҷик, аз қабили устод Абӯабдуллоҳи Рӯдакиву Ҳаким Абулқосим Фирдавсӣ, Носири Хусраву Абӯали ибни Сино, Мавлоно Ҷалолиддин Балхиву Шайх Саъдии Шерозӣ, Хоҷа Ҳофизи Шерозиву Камоли Хуҷандӣ, Мирзо Абдулқодири Бедилу Аҳмади Дониш ва устод Садриддин Айнӣ тавассути маърифату худшиносӣ дарк кардани муаммои дунёву охиратро талқин мекарданд. Бинобар ин, ҷавонону наврасон, ки худро мусулмон ва пайрави мазҳаби ақлгарои ҳанафӣ меҳисобанд, ҳуқуқи маънавӣ доранд, ки аз меросбари шахсиятҳои оламшумули илмию ахлоқӣ будани хеш ифтихор кунанд. Ҳамчунин, аҳли маҷлисро ба масъалаи пойдории оилаҳои ҷавон, омода намудани фарзандон ба зиндагии мустақилона, хубу аъло донистани забони давлатӣ ва ду забони хориҷӣ, истифодаи технологияҳои муосири коммуникатсионӣ даъват кард. Дар қисмати дуюми вохӯрӣ дар деҳаи Чоргултеппаи ноҳия баргузор шуд, номзади илмҳои педагогӣ  – Вализода Одинашоҳ баромад намуда, дар бораи моҳияти қонунҳои Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон», «Дар бораи масъулият барои таълиму тарбияи кӯдак», инчунин татбиқи онҳоро дар амал бо далелҳои дақиқу оммафаҳм ба саҳми иштирокчиён расонид. Таъкид доштанд, ки бояд омили маънавии рушди ҷомеа аз дигар омилҳо бартарӣ дошта бошад, зеро барои расидан ба ҳаёти маънавӣ заминаи моддиву техникӣ, иқтисоди пешрафта, фарҳанги баланди сиёсӣ ва дониши мукаммали кишвардорӣ лозим аст ва ҳар яки моро водор месозад, ки барои татбиқи ҳадафҳои бунёдкоронаву созандаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон намунаи ибрат бошем. Дар қисмати охири мулоқотҳо дар доираи мавзуъ саволу ҷавоб баргузор гардид ва иштироккунандагон пешниҳод доштанд, ки чунин мулоқотҳо пайваста баргузор карда шавад.        ШУЪБАИ ИТТИЛООТ ВА ТАШХИСИ ДИНШИНОСӢ

Санаи 7-уми апрел ҷиҳати натиҷагирӣ аз фаъолияти семоҳаи аввали соли 2025-и Марказ, ҷаласа доир гардид. Дар ҷаласа Директори Марказ Холиқзода Абдураҳим, муовинон, сардорони шуъба ва дигар кормандони Марказ иштирок намуданд. Нахуст, оид ба ҷамъбасти семоҳаи фаъолияти Марказ ҳисобот аз ҷониби муовини директор – Ваҳобзода Абдураҳмон ба таври муфассал шунида шуд. Ишора гардид, ки Марказ ҳамчун ниҳоди илмӣ-таҳқиқотӣ соли ҷорӣ тибқи 17 адад нақшаҳои илмии корӣ ва 1 адад Барномаи илмии соҳавӣ, инчунин дар доираи мавзӯи «Таъсири равандҳои ҷаҳонишавӣ ва вазъи геополитикӣ ба ташаккули тафаккури динӣ дар давлатҳои миллӣ-дунявӣ: вазъ ва дурнамо дар Тоҷикистон» фаъолияти худро ба роҳ мондааст. Дар ин давра, ҳайати илмии Марказ тибқи Нақшаҳои корӣ аз тариқи воситаҳои ахбори омма, нашри мақолаҳо дар сомонаҳои интернетӣ, гузоришҳои таҳлилӣ, суҳбату вохӯриҳо бо мардум ва баромадҳо дар телевизион ва радиои кишвар корҳои мушаххасро ба анҷом расонида, ҳамчунин кормандони Марказ ҷиҳати омода намудани 2 монографияи илмӣ ва тарҷумаи 1 китоби илмӣ-фалсафии мутафаккири барҷастаи тоҷик Абумансури Мотурудӣ тайи давраи ҳисоботӣ машғули кор буданд. Тибқи Амри Президенти Ҷумҳурии Тоҷикистон аз 2-юми январи соли 2025, №АП-713 ҷашнвораи 1155-солагии олими бузурги тоҷик Абумансури Мотурудӣ дар нимаи дуюми моҳи майи соли 2025 дар назар аст. Бахшида ба солгарди Абумансури Мотурудӣ китоби “Тавҳид”-и ин мутафаккири бузург ва асосгузори мактаби каломӣ аз забони арабӣ ба тоҷикӣ тарҷума ва тақдими иштирокчиён мегардад. Таҳти роҳбарии доктори илмҳои ҳуқуқ, профессор Абдураҳим Холиқзода нишондиҳандаи фаъолияти корӣ сол аз сол ба маротиб беҳтар шуда истодааст. Таҳлили фаъолияти корӣ аз соли 2021 инҷониб собит намуд, ки теъдоди мақолаҳои илмиву оммавӣ, мулоқоту вохӯриҳо, таҳия ва нашри монографияҳо рӯ ба афзоиш буда, хусусан сатҳу сифати кор беҳтар гаштааст. Директори Марказ муҳтарам Холиқзода Абдураҳим фаъолияти семоҳаи аввали соли 2025 – ро натиҷагирӣ карда, ҷиҳати боз ҳам рушди бештари соҳа, фаъолияти илмии самаранок ва иштироки фаъолона дар татбиқи сиёсати давлатӣ ба кормандон дастуру супоришҳо доданд.   ШУЪБАИ ИТТИЛООТ ВА ТАШХИСИ ДИНШИНОСӢ  

18-уми марти соли 2025 дар толори бинои мақомоти иҷроияи ҳокимияти давлатии ноҳияи Рӯдакӣ бо иштироки А. Холиқзода – Директори Муассисаи давлатии “Маркази исломшиносӣ” дар назди Президенти Ҷумҳурии Тоҷикистон, Парвиз Дамдорзода – намояндаи Прокуратураи генералии Ҷумҳурии Тоҷикистон, Неъматулло Давлатзода – муовини Раиси ноҳияи Рӯдакӣ, бо сармутахассисони дин, танзими анъана ва ҷашну маросим, бахши кор бо занону ҷавонон, собиқадорон, раисони маҳаллаҳо, ходимони дин ва аҳолӣ, вохӯрӣ доир гардид. Вохӯриро бо сухани ифтитоҳии муовини раиси ноҳия Неъматулло Давлатзода оғоз гардид. Муовини раиси ноҳия меҳмононро хайрамақдам гуфта, мавзӯи вохӯриро ба ҳозирин шарҳ дод. Сипас, Парвиз Дамдорзода – намояндаи Прокуратураи генералии Ҷумҳурии Тоҷикистон дар мавзӯҳои “Муҳтавои Паёми Пешвои миллат, пешгирии шомилшавии ҷавонон ба гурӯҳҳои ифротгаро, ҷалби ҷавонписарон ба сафи Қувваҳои Мусаллаҳи Ҷумҳурии Тоҷикистон, баланд бардоштани маърифати ҳуқуқии шаҳрвандон, пешгирии зӯроварӣ дар оила”, баромад намуд. Дар идома, Холиқзода Абдураҳим – Директори Муассисаи давлатии “Маркази исломшиносӣ” дар назди Президенти Ҷумҳурии Тоҷикистон баромад намуда, аввал ҳозиринро бо ҷашни Наврӯзи ҷаҳонӣ табрик намуд, сипас дар бораи хатарнокии терроризму экстремизм, мазмуну муҳтавои Қонунҳои Ҷумҳурии Тоҷикистон «Дар бораи мубориза бар зидди экстремизм (ифротгароӣ)», «Дар бораи озодии виҷдон ва иттиҳодияҳои динӣ», «Дар бораи танзими анъана ва ҷашну маросимҳо дар Ҷумҳурии Тоҷикистон» ва «Дар бораи масъулияти падару модар дар таълиму тарбияи фарзанд», дар бораи додани фитри рӯза ба ятимону ниёзмандон, маъюбон, паст кардани нарху наво дар бозорҳои ноҳия дар арафаи иди Фитр ба иштирокдорон маънидод намуд. Қайд карда шуд, ки ҳар нафаре, ки аз оромиву сарсабзии ин сарзамин, амнияту сулҳ, ваҳдату ягонагӣ ношукрӣ дорад, инсони комил буда наметавонад. Донистани фарҳанг ва арзишҳои миллӣ, ҳифзу гиромӣ доштани онҳо, муттаҳид будан, шукргузорӣ кардан аз миллату давлати обод, рисолати ҳар як фарди солимфикри ҷомеа мебошад. Мардуми шарифи Тоҷикистон, алалхусус ҷавонон бояд фирефтаи дасисаҳои ҳар гуна гурӯҳҳои ифротгаро нашаванд ва дар фазои сулҳу субот зиндагиву фаъолият кунанд. Чорабинӣ дар фазои озоду самимӣ баргузор гардида, иштирокдорон аз рафти баргузории он қаноатманд гардиданд.

13-уми марти соли равон дар шаҳри Турсунзода мулоқот бо мудиру сармутахассисони танзими анъана ва ҷашну маросими ҷамоатҳои шаҳраку деҳотӣ, фаъолони ҷомеа, имомхатибони масҷидҳои марказӣ, ҷомеи имомони панҷвақтаи шаҳри Турсунзода, дар мавзӯи “Дар бораи самтҳои асосии сиёсати дохилӣ ва хориҷии Ҷумҳурии Тоҷикистон”, ки дар Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ аз 28.12.2024 баён доштанд, баргузор гардид. Сухани ифтитоҳиро Остоназода Саидамин Ҳазрат, муовини раиси ноҳияи шаҳри Турсунзода, оғоз намуда, меҳмононро муаррифӣ намуд. Сипас, Холиқзода Абдураҳим Ғафор – Директори Маркази исломшиносӣ дар назди Президенти Ҷумҳурии Тоҷикистон ба ҳозирин оид ба муҳтавои Паёми навбатии Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ аз 28.12.2024 баён намуд ва масъалаҳои муҳимми тарбияи ҳуқуқию ахлоқӣ ва маънавии шаҳрвандон баромад намуд. Дар идомаи баромади хеш, Абдураҳим Холиқзода қайд намуд, ки имрӯз мо бо шукӯҳ ва сарфарозӣ аз сулҳ ва амнияти кишвар шукр мекунем, бештари эътиборро ба масъалаҳои таъмини амнияти кишвар ва мубориза ҷиҳати пешгирӣ аз зуҳуроти хатарноки замони муосир, аз ҷумла терроризму экстремизм, таасубу хурофот ва дигар падидаҳои манфӣ дода, корҳои фаҳмондадиҳиро миёни аҳолӣ вусъат бахшем, мардумро ба корҳои ободониву созандагӣ даъват намоем. Ҳамзамон, Назариён Мансур Ниёзӣ – сармутахассиси раёсати ташхиси диншиносии Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон доир ба масъалаи “Пешгирии таълимоти ғайриқонунии динӣ, ифротгароӣ ва шомилшавии ҷавонон ба ҳизбу ҳаракатҳои иртиҷоӣ” баромад намуд. Дар охири чорабинӣ бо аҳли нишаст сӯҳбати озод гузаронида шуд. Шуъбаи иттилоот ва ташхиси диншиносӣ

29 январи соли 2025 дар толори Мақомоти иҷроияи ҳокимияти давлатии шаҳри Истаравшан дар заминаи иҷрои дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар Маҷлиси Ҳукумати Ҷумҳурии Тоҷикистон оид ба ҷамъбасти натиҷаҳои рушди иҷтимоӣ ва иқтисодии кишвар дар соли 2024 ва вазифаҳо барои соли 2025 баён гардиданд, вохӯрии судманд бо иштироки фаъолони шаҳри Истаравшан доир гардид. Дар вохӯрӣ раиси шаҳри Истаравшан Адҳам Маъмурзода, директори Маркази исломшиносии назди Президенти Ҷумҳурии Тоҷикистон Холиқзода Абдураҳим ва мудири шуъбаи дин, танзими анъана ва ҷашну маросимҳои мақомоти иҷроияи ҳокимияти давлатии вилояти Суғд – Бониёзов Илҳом иштирок ва суханронӣ намуданд. Адҳам Маъмурзода чорабиниро оғоз намуда, таъкид дошт, ки имрӯза вохӯрии мо дар асоси дастуру супоришҳои Сарвари давлат, Пешвои муаззами миллат муҳтарам Эмомалӣ Раҳмон ва нақшаи чорабиниҳои муштараки мақомоти иҷроияи ҳокимияти давлатии шаҳри Истаравшан ва Маркази исломшиносии назди Президенти Ҷумҳурии Тоҷикистон доир гардида истодааст.  Мақсад аз вохӯрӣ, ин пеш аз ҳама пешгирии таълимоти ғайрирасмии динӣ, хурофот, ифротгароӣ ва шомилшавии ҷавонон ба ҳизбу ҳаракатҳои ифротӣ ва дар ин замина ҷалби мардум барои анҷом додани корҳои ободонӣ ба ҷои ҳаҷу умраи такрорӣ ва баланд бардоштани ҳисси ватанмеҳварии сокинон маҳсуб мегардад. Сипас, Холиқзода Абдуқодир оид ба муҳтавои асосии Паёми навбатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии кишвар “Дар бораи самтҳои асосии сиёсати дохилӣ ва хориҷии ҷумҳурӣ”, инчунин зарурати омӯзиши илмҳои дунявӣ, аҳамияти ҷидди зоҳир намудан ба таълиму тарбияи насли наврас, огоҳ будан аз ҳодисаҳои ҷаҳони имрӯза ва ҳамеша омода будан барои ҳифзи марзу буми кишвар андешаронӣ намуд. Инчунин, Шосаидзода Шаҳбоз номзад ба вакилии Маҷлиси намояндагони Маҷлиси Олии кишвар аз ҳавзаи интихоботии якмандатаи “Деваштич” №24 оид ба нуқтаҳои асосии Паёми Пешвои муаззами миллат ба Маҷлиси Олии кишвар ибрози андеша намуд. Якчанд нафар фаъолони соҳаҳои гуногуни шаҳру деҳоти Истаравшан ба сухан баромада, ба сиёсати созандаву бунёдкоронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон изҳори миннатдорӣ баён намуданд. Вохӯрии судманд бо фаъолонро раиси шаҳри Истаравшан Адҳам Маъмурзода ҷамъбаст намуда, барои ташриф ва баромадҳои пурмуҳтаво ба меҳмонон изҳори сипос кард.  Гуфта шуд, ки сокинони шарафанди сарбаланди шаҳри Истаравшан барои бо дастовардҳои назаррас истиқбол намудани ҷашни 35-солагии Истиқлоли давлатии Ҷумҳурии Тоҷикистон ва мубориза бурдан бо падидаҳои номатлуби ҷомеа корбариро пурзӯр менамоянд. Манбаъ: Маркази матбуотии Мақомоти иҷроияи ҳокиямияти давлатии шаҳри Истаравшан